SAFNAR ÁHEITUM FYRIR PÍETA SAMTÖKIN

Veiga Grétarsdóttir hefur sett sér það markmið að róa í kringum Ísland á kajak í sumar. Veiga ætlar með kajaksiglingunni að styðja við Píeta samtökin og kallar verkefnið „Á móti straumnum“.

RÆR Á MÓTI STRAUMNUM
Í sumar ætlar Veiga Grétarsdóttir að róa á sjókajak hringinn í kringum landið. Róðurinn hefst í byrjun maí og gera má ráð fyrir að hann taki sex til tíu vikur en áætluð vegalengd er um 2.000 kílómetrar.

Með verkefninu lætur Veiga draum sinn um að róa umhverfis landið rætast um leið og hún safnar fé til styrktar Píeta samtökunum. Verkefnið kallar Veiga „Á móti straumnum“ sem er táknrænt þar sem segja má að Veiga hafi siglt á móti straumnum alla ævi. Því fyrir rúmum fimm árum hóf hún kynleiðréttingarferli og við tóku miklar breytingar í lífi hennar.

Verkefnið hennar Veigu er einstakt á heimsvísu og hefur nú þegar vakið mikla athygli. Veiga ætlar að róa rangsælis hringinn í kringum landið en það hefur enginn gert áður en Veiga er líka fyrsta íslenska konan og fyrsta transmanneskjan í heiminum til að fara ein í svona stóran leiðangur á kajak. Þá mun Óskar Páll Sveinsson kvikmyndagerðamaður fylgja Veigu eftir næsta sumar og gera heimildarmynd um ferðalagið.

Á ferð sinni um landið mun Veiga halda fyrirlestra á átta stöðum þar sem hún mun kynna ferðina, segja frá kynleiðréttingarferlinu og svara spurningum. Fyrirlestrarnir verða auglýstir síðar.

Á meðan róðrinum stendur mun Veiga halda úti vefsíðu þar sem hægt verður að fylgjast með ferð hennar í kringum landið. Einnig veður hægt að fylgjast með Veigu á samfélagsmiðlum.

Heita á verkefnið

Hægt er að heita á verkefnið með því að leggja inn á styrktarreikning: 301-13-305038, kt: 410416-0690,
eða hringja í styrktarnúmer Píeta samtakanna í síma:

901 7111 – 1.000, kr.

901 7113 – 3.000, kr.

901 7115 – 5.000, kr.

————————————–
IBAN: IS040301133050384104160690
SWIFT: ESJAISRE